කොරෝනා වලින් මිදෙන්න, කුමක් කලයුතුද??..

අපි කුමක් කලයුතුද??..

වෛද්‍ය : උදාර වික්‍රමරත්න  

අනවශ්‍ය ලෙස බිය නොවී, අනවශ්‍ය අයුරින් කලබලකාරීව නොහැසිරෙමින්, තමන්ගේ මෙන්ම අන් අයගේ ආරක්ශාව, පහසුව තකා වගකීමෙන් කටයුතු කරමු..

පිරිස ගැවසෙන තැන්හි කටයුතු හැකිතාක් අවම කරගමු.. එවන් ස්ථාන ( නගරය, රෝහල, බස්රථය,දුම්රිය) වල කටයුතු කිරීමෙන් පසුව හොඳින් සබන් යොදා හෝ මධ්‍යසාර සහිත අත් පිරිසිදුකාරක යොදා හෝ අත් පිරිසිදු කරගනිමු..

කැස්ස හෝ කිවිසීමේදී ආවරණය කිරීම පිණිස අත යොදානොගෙන මුහුණ පැත්තට හරවා උරහිස ප්‍රදේශය හෝ වැලමිට ප්‍රදේශය භාවිත කරමු.. ලේන්සුවක් භාවිත කරයිනම් අතේ ශ්‍රාවයන් නොතැවරෙන පරිදි කටයුතු කරමු..

මුහුණ, ඇස්, මුඛය, නාසය හැකිතාක් ස්පර්ෂ නොකර සිටීමට වග බලා ගමු.. එසේ ස්පර්ශකල සෑම විටකම දෑත් පිරිසිදු කරගමු..

ඔබට ශ්වසන ආසාදනයක් හෝ රෝගයක් වැලඳී ඇතිනම් පමණක්, මුව ආවරණ( mask) භාවිතා කරමු..

සැකසහිත නිරාවරණය වීමක් සිදුවුණිනම් පමණක්ම රජයේ රෝහලකට නොපමාව පැමිණ නිරාවරණයවීම නිසිපරිදි නොසඟවා හෙළිකොට අවශ්‍ය පරීක්ෂාවන් සිදුකර ගනිමු.. සෙම්ප්‍රතිශ්‍යාවක් හෝ කැස්ස හෝ පැවති පමණින් එය කොරොනා රෝගය යැයි අනවශ්‍ය බියවීම් ඇතිකර නොගනිමු...

සමබල ආහාර වේලක් ලබාගනිමු.. පළතුරු ආහාරයට එකතු කරගමු.. ජලය අවශ්‍ය තරම් පානය කරමු.. මත්පැන්, මත්ද්‍රව්‍ය,අත්‍යාවශ්‍ය නොවන බෙහෙත් ආදිය භාවිතය නොකර ප්‍රතිශක්තිය පවත්වාගනිමු.. දීර්ඝ කාලීන රෝග තත්ත්වයන්ට (දියවැඩියාව,අධික රුධිර පීඩනය,හෘද රෝග) ගොදුරුවූ අය නම් අදාල ඖෂධ වර්ග නිසිපරිදි නොවරදවා භාවිතා කරමු..

අධික මානසික, කායික වෙහෙසකර කටයුතු, ගමන් බිමන් වලින් පසුව යෝග්‍ය පරිදි විවේකයෙන් ගත කරමු..

භාවනාව, ධර්මය ජීවිතයට ලංකරගෙන කටයුතු කරමු.. හැකි සෑමවිටම පින් දහම් කටයුතුවල යෙදෙමු... සෑමදෙනාටම මෛත්‍රිය පතුරුවමින් කටයුතු කරමු.. නොදන්නාට දන්නාදෙය පැහැදිළිව කියාදෙමු, දැනුවත් කරමු..

මේ ලොව පැතිරීගිය එකම හෝ ප්‍රථම වසංගතය නොවේ.. සිහියෙන් , සෞඛ්‍ය අංශ ලබාදෙන උපදෙස්වලට 100% අවනත වෙමින් කටයුතු කරමු..

අපි රැකෙමු, අපි රැකගමු.....
වෛද්‍ය : උදාර වික්‍රමරත්න